香港手語歌舞劇團
香港手語歌舞劇團（英文：Hong Kong Sign Language Musical Theatre）前身叫手‧語‧歌劇團，係香港喺2009年成立嘅一個非牟利組織，主要用手語嚟創作音樂劇。
背景[編輯]
呢個組織最初由陳華亮（俗稱「鬼sir」）喺2009年12月23號成立。佢希望用呢個組織嚟將手語「融入藝術表演」，同時令手語嘅歌舞「發揚光大」[1]。呢個組織係香港第一個以手語嘅歌舞為主嘅團體。
團體[編輯]
呢個團體主要由義工所組成[2]，間中都會搞唔同嘅表演[3]，包括同其他唔同嘅機構一齊參與一啲義務表演，呢啲機構包括：香港撒瑪利亞防止自殺會、香港中華基督教青年會、Uknow、基督教懷智服務處、香港青年聯會、中華基督教會基順學校、百職社會服務團、NSA VQ82、匡智會、聾人福利促進會、十大傑出青年選舉、支聯會、家庭及少數族裔事務工作小組、啟勵扶青會、森林樂、藝術人家、同路德會。
目標[編輯]
根據呢個團體嘅Facebook版面，佢嘅使命係：「以表演藝術改善人類生命品質和充實人類生活，不以利潤為導向，拓展多方面嘅藝術探索和文化交流，肩負向普羅大眾推動手語及舞台藝術、提升人文素質嘅使命」[2]。
呢個劇團組成嘅宗旨，就係要：推動「手語普及化」、同埋「融合視覺藝術同埋表演藝術」，同時亦都「將手語嘅歌、跳舞、同埋戲劇合并，將手語推去另一個藝術嘅層面」。除此之外，呢個團體亦希望「公眾人士可以認識手語，跟住去學手語」，同埋「拉近唔同能力嘅人士之間嘅距離」[2]。
核心成員[編輯]
核心成員包括藝術總監陳華亮先生（藝名：阿鬼）、副藝術總監潘甘儀（Grace Pun）小姐、行政總監鍾喺思（Joyce Chung）小姐、藝術幹事鍾宛澄（Canetti Chung）小姐同張沛雯（Nicole Cheung）小姐。
榮譽[編輯]
個劇團曾經喺2009年嬴咗「YMCA 聯青聾人中心」第七屆香港手語歌比賽嘅『冠軍』、『亞軍』、『最閃爍表現獎』、『最佳手語演繹獎』同埋『創意精神獎』總共五個獎。
到2010年嘅第八屆香港手語歌比賽，個組織就贏咗「演繹歌曲」同埋「自選歌曲」，分別贏『亞軍』、『季軍』同埋『最閃爍舞台表現獎』。
到2011年5月，個團體喺「兩岸四地青年團體」合辦嘅「夢想啟航行動」入面，攞到2個大獎、夾埋贏咗$6萬蚊嘅獎金。
攷[編輯]
- ↑ 〈我有正能量：手語歌舞 蹈向共融〉. on.cc. 2016-11-20.
- ↑ 2.0 2.1 2.2 〈香港手語歌舞劇團〉. Facebook.
- ↑ 〈香港手語歌舞劇團 - Love & Light HK〉. 香港光愛中心.