寵物小精靈中文版命名爭議

寵物小精靈中文版命名爭議（Pokémon Chinese translation dispute）係喺2016年寵物小精靈系列（Pokémon系列）遊戲《寵物小精靈 太陽／月亮》官方中文化嗰陣，因爲翻譯「以普代粵」而引發嘅爭議，尤其喺香港方面激起極大嘅反對浪潮。

事情經過

寵物小精靈系列自從1996年推出以嚟，香港一直譯成《寵物小精靈》，而台灣就譯成《神奇寶貝》，中國大陸唔同電視台喺90年代就分別由香港同台灣引進動畫，所以大陸同時有《寵物小精靈》同《神奇寶貝》、《口袋妖怪》三個名。三地都播放同出版過好多動畫、漫畫作品，入面啲譯名全部都經過日方審批，依照日方嘅指定，係官方譯名。

2016年2月底，寵物小精靈公司（The Pokémon Company）宣佈爲咗慶祝《寵物小精靈》20周年，將會喺冬季推出《寵物小精靈 太陽》同《寵物小精靈 月亮》，遊戲加入繁體中文同簡體中文版本，「統一」將Pokémon翻譯做「精靈寶可夢」。寵物小精靈公司董事石原恒和拍咗條YouTube影片，聲稱呢個決定係希望將Pokémon呢個名推廣得更加遠，又話「精靈寶可夢」呢個譯名，除咗當中嘅「寶可夢」發音同「Pokémon」相近，亦都保留咗嚟自香港舊譯名「寵物小精靈」嘅「精靈」二字，同埋嚟自台灣舊譯名「神奇寶貝」嘅「寶」字。

但係事實上，「精靈寶可夢」呢個名最早可以追溯到2011年，喺中國大陸CCTV-6播放嘅《Pokémon》電視動畫，當初負責中國電視動畫嘅導演統製張麗莉提到，因爲「寵物小精靈」同「神奇寶貝」呢兩個名喺中國大陸一早就畀人捷足先登搶咗嚟註冊，令佢哋冇得用，先喺2010年左右起過個新名。翻譯過程同結果經任天堂日方多番斟酌做最終確定。由於張麗莉團隊處理嘅係當時中國大陸入面嘅譯製問題，日方亦都冇指示佢要考慮其他漢語語言或者漢語方言嘅發音同文化，成個翻譯過程只係以普通話嘅發音出發，嚟進行構思同由日方選出定案。呢啲事實都冇喺石原恒和條片度講出嚟，批評者指責佢嘅講法同事實有出入，甚至係講大話。香港同好對《寵物小精靈》被改名表示憤怒，指出「寶可夢」嘅粵語（廣東話）發音同「Pokémon」根本唔近，認爲用廣東話做母語嘅香港地區，唔應該被基於普通話（或者同樣屬於官話規範化語言嘅國語）嘅譯名統一，要尊重本土語言嘅地位，而且呢個時候觀眾已經擔心會影響埋動畫版，影響埋小精靈嘅名；部份台灣同好亦都對「神奇寶貝」呢個名被換走表示反彈。

2016年5月10號，任天堂香港爲配合《寵物小精靈 太陽／月亮》中文版發佈，公佈頭嗰151隻小精靈嘅官方「統一」中文譯名。151隻小精靈嘅「統一」譯名以台灣傳統譯法居多，部份就以新嘅音譯代替，93隻角色唔再採用原本嘅港譯名，27隻唔再採用原本嘅台譯名，最終沿用原本港譯名嘅角色只有4隻。當中嘅代表焦點，有香港傳統譯名「比卡超」改咗做「皮卡丘」，粵語讀音就變成「粵拼：Pei⁴ Kaa¹ Jau¹」，同日文「ピカチュウ（Pikachu）」嘅音差天拱地，形同改名；亦都有啲新譯名喺粵語裏面嘅發音顯得不雅。改名嘅決定引起好多香港人反對，甚至認爲由「寶可夢」到眾多小精靈嘅名，都淨係考慮普通話或者國語，而唔考慮粤語廣東話嘅效果，係「以普代粵」——以普通話或者國語嚟取代廣東話，係語言入侵嘅問題，批評決策者唔尊重香港語文，對粵語無知但係仲咁自大，冇考慮廣東話嘅語境同文化。有文化研究評論甚至批評任天堂企圖描繪出一個假想嘅「均質華語世界」，將普通話或者國語當做係唯一合法嘅中文代表，結果等如將香港文化收編入「大中華」裏面，成爲另一種「去本土化」嘅過程，令粵語人士感到被普通話侵略。譯名調動幅度嘅對比之大，引起香港玩家不滿，要求任天堂喺小精靈嘅譯名上保留香港嘅本地特色，區分出兩種中文化版本。正如Bandai嘅《GUNDAM》系列，無論係舊作定係新作，都會分開三地嘅譯名，分別譯做《高達》（香港）、《鋼彈》（台灣）同《敢達》（中國大陸）。。

不過，任天堂表示唔會改變之前做嘅決定。《寵物小精靈 太陽／月亮》製作人增田順一接受採訪時，話希望翻譯都可以由「當地人」嚟進行，由遊戲開始，逐漸發展到動畫、電影等等其他領域都要改用「統一」譯名，改名以「還原開發者當初命名嘅原意」爲基準。

網上有啲人會認爲呢次改名行爲同「叮噹」改稱「多啦A夢」相似，將兩者攞嚟比較，借「多啦A夢」改名嘅事嚟支持「寶可夢」統一譯名。但係有批評者指出，「多啦A夢」改名後，喺粵語同普通話入面都保持發音相似，並冇「以普代粵」、唔尊重香港語言習慣嘅問題，同「寶可夢」、「皮卡丘」等等嘅「以普代粵」改名事件冇得比較。同好組織「叮噹小城」更多次發文，譴責以普通話或國語譯名取代粵語譯名嘅行爲。

造成影響

《寵物小精靈》嘅「統一」譯名公佈後，香港網民喺香港任天堂公司嘅Facebook洗版，反對呢次改名。愛好者亦都喺Facebook專頁上發起咗「爭取Pokémon保留各地譯名」聯署行動，希望收集簽名推翻任天堂嘅決定嚟保留原先嘅譯名，而聯署活動只係推出半日，就吸引近3000名網友畀like，同時有近千人轉載分享。批評改名嘅一方包括咗嚟自新聞界同語文界嘅公眾人士或團體，包括新聞主播伍家謙同埋語文關注團體港語學等等，認爲喺香港，要將外語譯得貼近粵語發音先至合理，如果以普通話譯名取代，會係一種「墮落」。

由於香港任天堂冇回應支持者，有20幾人發起「十萬伏特大遊行」遊行活動嚟抗議，遊行隊伍最後去咗日本駐香港總領事館遞交陳情書。

事件發酵後，任天堂表示聲稱覺得抗議嘅人帶嚟危險，可能取消首屆喺香港舉辦嘅2016小精靈國際錦標賽香港區賽事（2016 Pokémon World Championships Hong Kong Video Game National Championships），最終任天堂表態，將比賽日期由原本嘅6月9號延期到7月3號先搞。對於延期嘅事，粵語配音動畫觀眾指責任天堂「挑撥」鍾意比賽嘅人，令鍾意比賽嘅人將反對改名嘅人當做仇敵，做成「借刀分化」嘅結果。

香港賽馬會註冊嘅參賽馬匹入面，亦都有一隻叫做「比卡超」，佢其中一個馬主係東華三院執行總監蘇祐安。蘇祐安向傳媒表明堅拒將愛駒改名，而隻馬個名嘅靈感的確係取自小精靈比卡超，受訪時蘇祐安仲打咗條「十萬伏特」閃電呔嚟支持愛駒。

後續發展

2017年4月，手機遊戲《Pokemon GO》推出咗重大更新，只要偵測到嗰部手機使用「繁體中文（香港）」嘅語言系統，就會強制顯示成「精靈寶可夢」同「皮卡丘」等等嘅「統一」譯名，即使以往捕捉嘅精靈未改名，亦會變成新嘅中文譯名，部分遊戲對白喺粵語入面變得不文。如果玩家唔希望睇到統一譯名，就必須改咗整部手機嘅作業系統語言先得。呢次更新遭受到唔少香港玩家抗議，好多用戶喺AppStore留咗一星評分，或者喺香港版App Store嘅《Pokemon GO》留言表達不滿。

譯名被改之後，任天堂同寵物小精靈公司曾經嘗試聯合唔同公司合作，授權香港嘅品牌用小精靈肖像嚟做廣告或者包裝宣傳，同時舉辦答精靈名換獎品嘅網上遊戲活動。但係參同活動嘅香港人，絕大多數都用番「比卡超」、「伊貝」、「奇異種子」、「波波球」等等原本譯名嚟答問題，有關品牌亦都將呢啲答案視爲有效回答，可以獲獎。批評者認爲任天堂或寵物小精靈公司嘅行銷活動落得尷尬收場。

香港無綫電視翡翠台由1998年11月開始播出《寵物小精靈》，但係因為日方係都要將《寵物小精靈 太陽&月亮》電視動畫嘅字幕同配音改做官方「統一」譯名，無綫電視冇辦法同日方對譯名達成共識，從此放棄買《寵物小精靈》嘅動畫續篇。最終電視動畫變成由奇妙電視77台喺2017年12月15號起播映，動畫電影方面，就由《劇場版 寵物小精靈 就決定是你了！》開始，變成由奇妙電視旗下嘅驕陽電影發行。而華納兄弟發行嘅真人電影《POKÉMON 神探Pikachu》喺香港上映時，除咗直接採用英文「Pokémon」、「Pikachu」同「Mew 2」之外，其餘都用官方「統一」譯名。

2019年4月，趁系列新作《寶可夢 劍／盾》推出，官方再次改名，將「精靈寶可夢」嘅「精靈」二字刪走。呢次改名，並冇喺面向香港群眾嘅社交媒體上面公佈或者發表聲明，官方淨係將佢嘅facebook專頁由「精靈寶可夢　香港」改名做「寶可夢　香港」，只有訂閱者先至會收到facebook系統嘅自動通知。直至8月1號，先至喺面向大陸群眾嘅官方微博帳戶度，公佈「自2019年8月1日（星期四）起，將逐步變更『精靈寶可夢』的名稱爲『寶可夢』」。由於當初日方將個名由香港原本嘅官方譯名「寵物小精靈」改做「統一」譯名「精靈寶可夢」嗰陣，石原恒和喺YouTube影片入面聲稱係特登保留嚟自香港嘅「精靈」二字，照顧香港受眾嘅感情。今次嘅再度改名，正正係刪走石原恒和聲稱係嚟自香港嘅元素，因此再度激起香港人憤怒。網民更揭發，寵物小精靈公司喺呢次再度改名嘅同時，仲將佢YouTube頻道石原恒和喺2016年2月底宣佈改名嘅影片，變咗做私人影片，令公眾無得睇返，批評官方企圖「毀屍滅跡」，唔希望觀眾翻查石原恒和當日呢番言論。

2020年3月同10月，「寶可夢」簡體官方網站同官方微博帳戶「Pokemon寶可夢」兩度公佈一啲小精靈嘅簡體譯名更改。當中嘅變更，包括迴避英文字母，以及迴避「毒、死、偷、盜、流氓」等等字眼。問題係，呢啲小精靈改名，都淨係喺簡體版本適用，繁體版本唔使改，結果係簡體版本同繁體版本並唔統一。噉做法再度引起香港網民不滿，批評官方又再一次公然講大話，指責官方連最後一個「藉口」——要「統一」華文版本名字，都俾官方自己嘅行爲篤穿。並指出除咗「故意用普通話或國語嘅譯名取代粵語譯名」呢個講法之外，再冇其他理由可以唔自相矛盾噉解釋官方嘅行爲，斥責官方係明顯嘅語言入侵。

此外，任天堂同Game Freak等公司，喺「寵物小精靈」改名事件後，連其他遊戲亦都越嚟越以普通話或者國語嘅譯名，去取代原本通行嘅粵語譯名，包括將「瑪利奧」、「龍王」等原來譯名，更改做違反粵語嘅「瑪利歐」、「庫巴」等等，亦都令香港人不滿，抨擊佢哋「肆無忌憚噉一次又一次向粵譯開槍」，香港人亦普遍淨係會用舊譯名，唔會用「新」譯名。

睇埋

• 母語教學
• 推普
• 普教中爭議
• 語言權利
• 廣州撐粵語行動