易搵度捷思法

出自維基百科，自由嘅百科全書
(由可得度捷思法跳轉過嚟)
以色列心理學家丹尼·加利曼做嘅研究，確立咗易搵度捷思法嘅概念。

易搵度捷zit6思法（英文：availability heuristics），又可以叫易諗度捷思法或者可得度捷思法，係思考捷徑嘅一種，講緊人類喺思考嗰陣，往往都淨係靠自己即時諗得到嘅例子嚟做判斷，好多時都會因而喺思考上出現偏誤—呢種現象個名，就係指「基於易搵程度嚟諗嘢嘅思考捷徑」噉嘅意思。响廿一世紀初，易搵度捷思法吸引咗唔少心理學同經濟學方面嘅學者研究，當中「易搵度捷思法會點樣左右人對風險嘅判斷」呢條問題零舍多人關注。

概念基礎[編輯]

内文：捷思法同決策

易搵度捷思法係一種捷思法。捷思法係一類「思考上嘅捷徑」，捷思法定義上唔能夠 100% 準確噉引導人得到真確嘅資訊，但係就「喺好多情況下都啱用」而且能夠幫思考者慳好多時間精神。

依家想像有一位管理者，叫佢做「劉經理」，劉經理手下有兩位員工——阿明同阿偉，劉經理要做決策，將升職嘅機會交畀阿明或者阿偉，客觀記錄顯示阿明同阿偉嘅整體表現一樣咁好，但劉經理諗返起兩人嘅表現，以近排發生過嘅事（容易回想起嘅事）作準[1]，而阿明近呢幾日嘅表現係好過阿偉，最後劉經理選擇咗升阿明唔升阿偉。喺呢個情況當中，劉經理做決策嘅時候不自覺噉偏重「容易諗到嘅資訊」[註 1]而喺決策上出咗少少偏差。呢種情況就係易搵度捷思法嘅一個例子[2][3]。

一般認為，易搵度捷思法並唔係一種對決策有利嘅思考方式：呢種思考法，令到人過於側重某啲資訊——呢啲資訊可能係最近發生嘅嘢，或者係因為某啲緣故令人特別印象深刻，而呢啲資訊唔一定係最有代表力嘅，例如一位員工最近嗰一個星期嘅表現，唔一定代表到晒佢嘅整體表現。偏重一啲「唔一定係最有用」嘅資訊，就可能會扭曲一個人嘅決策。

成因機制[編輯]

「嗯，我咁易就諗返起喺電視上見到空難嘅... 空難梗係成日發生頂啦。」
睇埋：記憶、情緒記憶同系列位置效應

心理學同認知科學方面嘅研究者有著力研究「點解人類會有易搵度捷思法噉嘅諗嘢傾向？」呢條問題。呢方面嘅研究好多時都係集中討論記憶功能所扮演嘅角色，主張人類係回想返打前見過嘅例子嗰陣出咗某啲偏差[4]。

情緒記憶被指係易搵度捷思法嘅主因之一。廿世紀嘅認知心理學已經確立咗一點[5]:p 94：情緒能夠令到記憶更加深刻；同一般嘅事件比起嚟，令人產生強烈情緒嘅事件零舍大機會會事後被記返起，呢種現象就係所謂嘅記憶提升效應。而家想像一個人要喺腦入便評估坐飛機遇到空難嘅機率有幾高，佢喺腦海入便摷返啲記憶，發覺自己好易諗返起「見到電視喺度講空難」嘅回憶，因而就覺得遇上空難嘅機率好高；不過，佢之所以會咁易諗返起空難記憶，並唔係因為呢啲記憶真係出現得特別頻密，而係因為空難記憶雖然出現得唔密，但會引起強烈嘅恐懼，所以特別易諗返起；相比之下，「見到電視報撞車」就成日都發生，頻密到佢啲感覺麻木晒[註 2] ——而根據廿一世紀初嘅統計數字，搭車遇上意外身亡嘅機率，明顯大過搭飛機嘅。喺呢一種情況下，諗嘢嘅人因為記憶提升效應而喺回想過去嗰陣出咗偏誤，進而喺判斷風險嗰陣跟住出埋錯。

風險判斷[編輯]

睇埋：風險判斷

風險判斷顧名思義就係指緊人類判斷「呢件事會發生嘅風險有幾高」嘅過程。人類對風險嘅判斷，深受易搵度捷思法影響。例如實證研究表示，人類做「係咪要食煙」嘅決策嗰時，會或多或少噉憑住「有幾常聽到有人死於肺癌」嘅記憶—呢個過程明顯能夠受易搵度捷思法左右—嚟作出「我有幾大機會患上肺癌」嘅風險判斷。

例如有實證研究就試過分析人類點樣評估自己受天災影響嘅風險，發現親友曾經經歷過水浸等災害嘅人，比較傾向覺得自己大機會受到天災影響。呢種噉嘅風險判斷，仲可以影響人類對「氣候變化帶嚟嘅轉變，有幾大機會會影響到我」嘅判斷，影響埋啲人傾向會支持咩政策[6]:4.1。

睇埋[編輯]

引述[編輯]

  1. ↑ "Availability Heuristic". Oxford Reference.
  2. ↑ （英文） 易搵度捷思法，DecisionLab
  3. ↑ Pachur, T., Hertwig, R., & Steinmann, F. (2012). How do people judge risks: Availability heuristic, affect heuristic, or both?. Journal of Experimental Psychology: Applied, 18(3), 314.
  4. ↑ Esgate, Anthony; Groome, David (2005). An Introduction to Applied Cognitive Psychology. Psychology Press. p. 201
  5. ↑ Dale, S. (2015). Heuristics and biases: The science of decision-making. Business Information Review, 32(2), 93-99.
  6. ↑ Siegrist, M., & Árvai, J. (2020). Risk perception: Reflections on 40 years of research. Risk analysis, 40(S1), 2191-2206.

註釋[編輯]

  1. ↑ 至於「易諗度」呢個概念要點樣操作化，可以睇睇記憶提取同反應時間。
  2. ↑ 可以睇睇習慣化。

參考[編輯]

  • McAlaney, J., & Benson, V. (2020). Cybersecurity as a social phenomenon. In Cyber influence and cognitive threats (pp. 1-8). Academic Press，呢篇文講緊電腦保安方面嘅工作可以點樣運用社會科學知識，當中有提到易搵度捷思法，主張人類可能會因為「電腦病毒入侵電腦系統」呢樣嘢唔容易喺腦入便想像，而過度低估呢啲嘢發生嘅風險。
  • Nazlan, N. H., Tanford, S., & Montgomery, R. (2018). The effect of availability heuristics in online consumer reviews. Journal of Consumer Behaviour, 17(5), 449-460.
  • Schwarz, Norbert; Bless, Herbert; Strack, Fritz; Klumpp, Gisela; Rittenauer-Schatka, Helga; Simons, Annette (1991). "Ease of retrieval as information: Another look at the availability heuristic". Journal of Personality and Social Psychology. 61 (2): 195-202，呢場心理實驗提供咗證據，指易搵度捷思法係源自「記憶有幾易回想返起」多過「諗得返起幾多噉樣噉樣嘅記憶」。

外拎[編輯]

由「https://zh-yue.wikipedia.org/w/index.php?title=易搵度捷思法&oldid=2134154」收